ფრანსისკო დე სურბარანი

ფრანსისკო დე სურბარანი - დაიბადა 1598 წლის 7 ნოემბერს,ფუენტე-დე-კანტოსის მუნიციპალიტეტში (ესტრემადურას ავტონომიური გაერთიანება – ესპანეთი).იგი წარმოადგენდა ერთ-ერთ უდიდეს ესპანელ მხატვარს და თვალსაჩინო წარმომადგენელს სევილიური სამხატვრო სკოლისა.სწავლობდა ხუან დე როელასის სამხატვრო სკოლაში,სევილიაში.1617-1618 წლებში ცხოვრობდა და მუშაობდა ესტრემადურაში,რის შემდეგაც ბრუნდება სევილიაში,სადაც 1633 წლამდე დაჰყო.უკვე 1622 წლისათვის ფრანსისკო საკმაოდ ცნობილი მხატვარი გახლდათ და შეკვეთებაცს იღებდა სხვადასხვა მონასტრებისა და ეკლესიებისაგან.1626-1627 წლებში მხატვარმა დომინიკელთა ორდენის შეკვეთით დახატა 21 ტილო,რომლებიც გაჟღენთილი გახლდათ რელიგიური სიუჟეტებით.მათ შორის იყო გენიალური ნამუშევარი – “ჯვარცმული ქრისტე”.1628-1630 წლებში იმუშავა წმინდა პედრო ნოლასკოსა და წმინდა ბონავენტურას ცხოვრების ამსახველი ციკლის შექმნაზე. 1631 წელს კი ფრანსისკომ შექმნა მისი საუკეთესო ნამუშევარი – “წმინდა თომა აკვილანელის აპოთეოზი”,რომელიც იმთავითვე “შედევრად” იქნა აღიარებული.1634 წელს მხატვარმა მადრიდში იმოგზაურა.ამ პერიოდში მან მონაწილეობა მიიღო ბუენ-რეტიროს სასახლის მოხატვაზე,სადაც უარი თქვა რელიგიურ მოტივებზე და შექმნა ჰერკულესის გმირობებისადმი მიძღვნილი სამხატვრო ციკლი.გარდა ზემოთ აღნიშნული გენიალური ქმნილებებისა,მის ფუნჯს ეკუთვნის ასევე სხვა დიდებული ნამუშევრები: “ქრისტეშობა”,”მოგვთა თაყვანისცემა” და სხვა სურათები.მისი შემოქმედებითი პიკი 1630-იანი წლების ბოლოს დადგა,რა დროსაც მხატვრის პოპულარობამ ზენიტს მიაღწია.მისი ცხოვრების ბოლო ეტაპზე მხატვარი ლირიკული სიუჟეტების მქონე ტილოების ხატვით დაკავდა.1658-1664 წლებში ფრანსისკო მადრიდში ცხოვრობდა.ამ პერიოდში იგი მეგობრობდა უდიდეს ესპანელ მხატვართან დიეგო ველასკესთან.მიუხედავად ამისა,მისი პოპულარობა ნელ-ნელა კლებულობდა და საბოლოოდ შეკვეთებიც შეწყდა,რამაც მისი მატერიალური მდგომარეობის ძლიერ გაუარესება გამოიწვია.ფრანსისკო დე სურბარანი გარდაიცვალა 1664 წლის 27 აგვისტოს,ესპანეთის დედაქალაქ მადრიდში.მისი შემოქმედება კი წარმოდგენილია,მსოფლიოს მრავალ საუკეთესო მუზეუმებსა და გალერეებში.