ცილოვანი დიეტის დადებითი და უარყოფითი მხარეები დასახელდა

ცილოვანი დიეტის დროს ადამიანები, როგორც წესი წონაში შედარებით მარტივად იკლებენ. ამ დროს კვების რაციონში ჭარბობს ცილით მდიდარი პროდუქტები და იზღუდება ნახშირწყლების მიღება. ამერიკელი მეცნიერების მიერ უეიქ ფორესტის უნივერსიტეტში ახლახან დასრულებული ექსპერიმენტი ადასტურებს, რომ ამ ტიპის დიეტით ადამიანები წონაში ისე იკლებენ, რომ ძვლოვან და კუნთოვან მასას ინარჩუნებენ, რაც განსაკუთრებით მნიშვნელოვანია ხანდაზმულთა ჯანმრთელობისთვის. კვლევის შესახებ ინფორმაციას “ამერიკის ხმა” ავრცელებს.

კვლევის მონაწილეებმა 6 თვის განმავლობაში დაახლოებით 8.1 კგ დაიკლეს. კვლევისას გაირკვა, რომ დაკლებული წონის 87% შუატანის ცხიმზე მოდიოდა. ცილის მიღების დღიური ნორმა სხეულის წონის ყოველ კილოგრამზე – 8 გრამი ცილა იყო.

ამის მიუხედავად მეცნიერები ამბობენ, რომ როცა ადამიანი დიეტის დროს ერთი ტიპის საკვებს მეორეს შემცირების ხარჯზე ზრდის, იზრდება ჯანმრთელობის რისკებიც.

ადამიანებს, რომლებიც ცილოვან დიეტებს იცავენ ხშირად აქვთ კალციუმის და ვიტამინ D-ს ნაკლებობა, რისკებს შორის სახელდება ნაწლავის კიბოებიც.

ცილოვანი დიეტის უარყოფითი მხარეები გამოავლინეს ავსტრალიელმა მეცნიერებმა. მათი თქმით, ცილის დიდი რაოდენობით მიღებაზე დაფუძნებული დიეტები ჯანმრთელობაზე უარყოფით გავლენას ახდენს და სიცოცხლის ხანგრძლივობასაც ამცირებს. სპეციალისტების თქმით, ნახშირწყლების ძალიან შემცირება ორგანიზმს ზიანს აყენებს.

“ნახშირწყლებზე ბევრი ცუდი იწერება, განსაკუთრებით როცა საქმე დიეტას ეხება. მაგრამ, საბოლოო ჯამში, მთავარი საიდუმლო ბალანსშია და იმის ცოდნაში, თუ რა განსხვავებაა “კარგ” და “ცუდ” ნახშირწყლებს შორის” – ამბობს კვლევის წამყვანი ავტორი, პროფესორი ქრისტოფერ პროდი. მეცნიერი წონაში დაკლების მსურველებს ურჩევს, რომ ნახშირწყლები ხილით, ბოსტნეულით და გადაუმუშავებელი ბურღულეულით მიიღონ. გასახდომად კი ხმელთაშუა ზღვის დიეტაზე დაფუნძებული რაციონი აირჩიონ.

წონაში დაკლების ეფექტურ გზად დაბალანსებული და მრავალფეროვანი კვებაა, რომელშიც დღიური კალორიები 10-20 პროცენტამდეა შემცირებული.